...

Azərbaycanda ipoteka kreditləşməsinə dövlət investisiyaları artırılmalıdır - nazir

Biznes və iqtisadiyyat xəbərləri Materials 7 Dekabr 2011 16:50 (UTC +04:00)

Azərbaycan, Bakı, 7 dekabr /Trend, müxbir E.İsmayılov/

Azərbaycanda gənc ailələrin mənzil probleminin həlli üçün dövlət büdcəsindən ipoteka kreditləşməsinə ayrılan xərcləri artırmaq lazımdır. Trend-in məlumatına görə, bu barədə çərşənbə günü jurnalistlərə Azərbaycanın gənclər və idman naziri Azad Rəhimov deyib.

"Hazırda ölkədə ipoteka kreditləşməsinin şərtləri kifayət qədər yaxşıdır, o cümlədən, sosial ipoteka çərçivəsində faiz dərəcəsi 4, ilkin ödəniş isə 15 faiz səviyyəsindədir, kreditin verilmə müddəti 25 ilə qədər təşkil edir", - nazir bildirib.

Rəhimovun fikrincə, mənzil əldə etməkdə əsas problem sosial ipoteka çərşivəsində kreditin həcminin 35 min manat olmasıdır.

Onun sözlərinə görə, hazırda Azərbaycanda 30-35 min manata normal mənzil almaq kifayət qədər çətindir.

"Lakin bu məsələnı dövlət büdcəsindən ipoteka kreditləşməsinə daha çox vəsaitin ayrılması şərtilə tənzimləmək mümkündür", - Rəhimov qeyd edib.

Nazirin sözlərinə görə, hazırda ölkədə 60 minə qədər gənc insan var, onların ya yeni mənzilə, ya da mövcud mənzilin şəratinin yaxşılaşdırılmasına ehtiyacı var.

Azərbaycan Mərkəzi Bankı (AMB) da 2012-ci il dövlət büdcəsində 20 milyon manat səviyyəsində qoyulan sosial ipoteka üzrə xərcləri qeyri-kafi hesab edir.

AMB-nin idarə heyətinin sədri Elman Rüstəmovun sözlərinə görə, sosial ipoteka ala biləcək təsdiq edilmiş kontingent hazırda 100 min nəfər təşkil edir.

"Nəzərə alsaq ki, sosial ipotekanın maksimal həcmi cəmi 35 min manat təşkil edir, o zaman bu 20 milyon manat cəmi 600 nəfəri ipoteka kreditləri ilə təmin etmək üçün kifayət edəcək. Banklarda təxminən ümumilikdə 80 milyon manat dəyərində sosial ipoteka üzrə sorğular artıq qeydiyyatdan keçib. İnsanlar bu sistemdən istifadə etmək istəyirlər, bu vəsaitləri gözləyirlər", - Rüstəmov deyib.

Onun sözlərinə görə, bu gün sosial ipotekanın şərtlərini yüngülləşdirmək imkanı var.

"Bu məsələ qarşıda kəskin şəkildə durub və gələn il həll oluna bilər", - Rüstəmov qeyd edib.

Dekabrın 7-nə olan rəsmi məzənnə 0,7864 AZN/USD təşkil edir.

Xəbər lenti

Xəbər lenti