Azərbaycan, Bakı, 28 yanvar /Trend, müxbir N.İsmayılova/
İslam İnkişaf Bankı (İİB) fevralda Azərbaycanda Zərdab-Ucar-Ağcabədi yolunun modernləşdirilməsi və yenidən qurulması layihəsinin texniki-iqtisadi əsaslandırılmasının (TİƏ) hazırlanması üzrə məsləhətçi seçəcək. Bu barədə şənbə günü Trend-ə bankın Bakı ofisindən məlumat veriblər.
"Biz hazırda layihənin TİƏ-nin hazırlanması üzrə məsləhətçinin seçimi prosesindəyik. Məsləhətçinin artıq fevralın sonunadək seçiləcəyi gözlənilir", - bankdan bildiriblər.
2011-ci ilin yayında İİB Azərbaycana yol layihəsinin TİƏ-si üçün texniki kömək qismində 294 min dollar həcmində qrant ayrılmasını bəyənib.
Layihə yeni əməkdaşlıq proqramı (2011-2013-cü illər üzrə) çərçivəsində maliyyələşdiriləcək, maliyyələşdirmə həcmi TİƏ-nin hazırlanmasından sonra müəyyənləşəcək.
Azərbaycan 1992-ci ildən İİB-in üzvüdür və hazırda bankın ölkə üzrə portfeli 700 milyon dollara çatır ki, bu vəsait iqtisadiyyatın müxtəlif sahələrində layihələrin həyata keçirilməsinə ayrılıb. İİB-in Azərbaycanla 2011-2013-cü illərdə əməkdaşlıq üzrə yeni proqramının dəyəri 1,4 milyard dollar təşkil edir.
Bankın kapıtalında ölkənin iştirak payı 0,13 faizdir.
İİB 1975-ci ildə təsis edilib. Bankın kapitalı təsis edildiyi gündən 15 dəfə, yəni 2 milyard İslam dinarından (İslam dinarı İİB-in hesabının pul vahididir və Beynəlxalq Valyuta Fondunun bir xüsusi ekvivalentinə uyğundur) 30 milyard İslam dinarınadək artıb.