Azərbaycan, Bakı, 17 mart /Trend, müxbir A.Axundov/
2011-ci ildə xarici valyutada nominasiya olunmuş istiqrazlarla əməliyyatların həcmi 402,4 milyon olub ki, bu da Azərbaycan korporativ borc bazarının 36 faizini təşkil edib.
Trend-in məlumatına görə, bu barədə Milli Məclisin təsdiq etdiyi Azərbaycan hökumətinin 2011-ci ildə fəaliyyəti haqqında hesabatda deyilir.
"2011-ci ildə bazara yüksək həcmdə xarici valyutada nominasiya olunmuş istiqrazlar təklif edilib. Belə ki, ötən il xarici valyutada nominasiya olunmuş istiqrazlarla əməliyyatların həcmi 402,4 milyon olub ki, bu da korporativ borc bazarının 36 faizini təşkil edib. Hesabat dövründə yerli bazar üçün yeni alət olan xarici valyutda nominasiya olunmuş konvertasiya hüququna malik istiqrazlar ilk dəfə dövriyyəyə buraxılıb", - hesabatda qeyd edilir.
2011-ci ildə korporativ qiymətli kağızlar seqmentinin artım templəri əsasən korporativ borc bazarı alətlərinin dinamikası hesabına təmin edilib.
"2011-ci ildə korporativ istiqrazların ilkin və təkrar bazarı əvvəlki ilə nisbətən 3,7 dəfə artaraq 1 115 milyon manat təşkil edib. Hesabat dövründə borc alətləri vasitəsilə maliyyələşmə imkanlarına marağın artması da müşahidə edilib. Belə ki, korporativ borc bazarında əməliyyatların həcmi 4 dəfə artaraq 584,7 milyon manat təşkil edib", - hesabatda deyilir.
Hesabat dövründə səhm bazarının dərinləşməsi davam edib.
"Belə ki, 2011-ci il ərzində səhm bazarında əməliyyatların sayı əvvəlki ilə nisbətən 14 faiz, əməliyyatların həcmi isə 2 dəfə artaraq 1029 milyon manat təşkil edib", - hesabatda qeyd edilir.
