Azərbaycan, Bakı, 7 aprel /Trend, müxbir Ə.Həsənov/
2012-ci ilin yanvar ayında Azərbaycanda 10 514 ədəd daşınmaz əmlak qeydiyyata alınıb. Bu, ötən ilin analoji dövr göstəricisindən 46,6 faiz çoxdur. Trend-in məlumatına görə, bu barədə Əmlak Məsələləri Dövlət Komitəsinin şənbə günü yaydığı məlumatda deyilir.
Yanvarda qeydiyyata alınmış əmlakın ümumi sayı arasında 3860 mənzil, 3798 torpaq sahəsi, 2257 fərdi yaşayış evi, 290 qeyri-yaşayış binası, 196 qeyri-yaşayış sahəsi, 66 yaşayış kompleksi və 47 çoxillik əkmə olub.
"2012-ci ilin yanvar ayında özəlləşdirilmiş mənzillərin sayı 1191 ədəd olub, yəni ötən ilin analoji dövr göstəricisi ilə müqayisədə 45,1 faizlik artım müşahidə olunub", - məlumatda deyilir.
Hesabata əsasən, qeydiyyata alınan daşınmaz əmlakın ən böyük artımı qeyri-yaşayış sahələrinin payına düşüb ki, bu da 73,5 faiz təşkil edib. Bu göstərici yaşayış komplekslərinin qeydiyyatında 65 faiz, fərdi evlərdə 63 faiz, qeyri-yaşayış binalarında 59 faiz, torpaq sahələrində isə 48 faiz olub.
"Bir il əvvəllə müqayisədə cari ilin yanvarında çoxmərtəbəli binalar qeydiyyata alınmayıb", - məlumatda deyilir.
2012-ci ili yanvarında qeydiyyata alınan daşınmaz əmlakın ümumi sayında 61 faizdən çox regionların, 39 faizdən az isə Bakının payına düşüb.
"Müşahidələr göstərir ki, regionlarda qeydiyyata böyük maraq və bu göstəricinin artımı Bakının ümumi payını azaldır, lakin bu, heç də paytaxtda qeydiyyata alınma göstəricisinin azalması mənasına gəlmir. Belə ki, özəlləşdirilən mənzillərin və qeyri-yaşayış sahələrinin böyük hissəsi Bakının payına düşür", - məlumatda qeyd edilir.
2012-ci il fevralın 1-nə ümumilikdə 454 466 mənzil qeydiyyata alınıb. 2006-cı ilin əvvəlindən 2012-ci il fevralın 1-dək qeydiyyata alınan daşınmaz əmlakın ümumi sayı 658 min ədədi ötüb.
