Azərbaycan, Bakı, 9 aprel /Trend, müxbir A.Axundov/
Azərbaycanın Dövlət Şəhərsalma və Arxitektura Komitəsi Şəki şəhərinin baş planı layihəsini apreldə Nazirlər Kabinetinə təqdim edəcək. Bu barədə bazar ertəsi Trend-ə Dövlət Komitəsinin sədr müavini Dövlətxan Dövlətxanov bildirib.
"Komitə artıq şəhərin baş planı üzərində işi başa çatdırıb, indi onun müvafiq dövlət strukturları ilə razılaşdırılması prosesi gedir. Sənəd əsasən şəhərin böyük turizm potensialının inkişafına yönəlib", - Dövlətxanov qeyd edib.
Onun sözlərinə görə, habelə Gəncə şəhərinin baş planı üzərində iş başa çatıb.
"Bu sənədin razılaşdırılması prosesi yenicə başlayıb. Biz onu ilin sonunadək hökumətə təhvil verməliyik", - Dövlətxanov qeyd edib.
Onun sözlərinə görə, bundan başqa, Sumqayıt, Xırdalan, Balakən və Neftçala şəhərlərinin baş planlarının hazırlanması üzərində iş aparılır.
