Azərbaycan, Bakı, 13 aprel /Trend, müxbir Ə.Həsənov/
İspaniyanın "Epitsa" şirkəti 2030-cu ilə qədər "Böyük Bakının regional inkişaf planı"nın hazırlanması çərçivəsində ekoloji qiymətləndirməni 2013-cü ilədək başa çatdırmalıdır. Bu barədə cümə günü Trend-ə baş planın hazırlanması üzrə layihənin koordinatoru Novruz Eldarov bildirib.
"Epitsa" şirkəti ekoloji məsələlər üzrə məsləhətçi seçilib, aprelin 11-də şirkətlə müqavilə bağlanıb.
Azərbaycan hökuməti "Epitsa"nın işlərin yerinə yetirilmə tarixinin 2013-cü ilin oktyabr ayınadək dəyişdirilməsi təklifini qəbul etməyib. Belə ki, bu təklif ümumiyyətlə "Böyük Bakının inkişaf planı"nın hazırlanması müddətinin dəyişməsinə səbəb olardı. Bununla da məsləhətçi ilə imzalanan müqavilədə işlərin il ərzində başa çatdırılması qeyd olunub.
"Hazırda işlər tam sürətlə gedir və 2013-cü ilin mart ayının sonunadək əsas funksional sxemin hazırlığının tamamlanması gözlənilir", - Eldarov deyib.
Qeyd edək ki, layihə iqtisadi inkişaf məsələləri üzrə ABŞ-dan (Kaya Miller), şəhər planlaşdırılması üzrə İtaliyadan (Ancelo de Urso) məsləhətçilərlə və Bakı Dövlət Layihə İnstitutu ilə birgə hazırlanır.
