Azərbaycan, Bakı, 19 iyul /Trend, müxbir A.Axundov/
Azərbaycan Dövlət Gömrük Komitəsi (DGK) 2012-ci ilin birinci yarısında 135 ölkə ilə həyata keçirilən xarici ticarət əməliyyatlarının nəticələrini açıqlayıb. Bu barədə cümə axşamı Trend-ə DGK-dan məlumat verilib.
Ölkənin əmtəə dövriyyəsinin ümumi həcmi 17,17 milyard dollar təşkil edib ki, bu da ötən ilin analoji dövr göstəricisindən 1,4 faiz aşağıdır.
Xarici ticarət əməliyyatlarında 8,25 milyard dollar həcmində müsbət saldo yaranıb.
Bu dövr ərzində xarici ticarət əməliyyatlarına 6246 hüquqi və fiziki şəxs cəlb edilib, onlardan 3069 nəfəri hüquqi, 3177 nəfəri isə fiziki şəxs olub.
2012-ci ilin ilk altı ayında ixrac əməliyyatları 12,71 milyard dollar təşkil edib ki, bu da 2011-cu ilin analoji dövrü ilə müqayisədə 2,9 faiz aşağıdır.
İxracatda dövlət sektorunun payı 12,06 milyard dollar (94,89 faiz), özəl sektorun payı isə 577,89 milyon dollar (4,55 faiz) təşkil edib. Fiziki şəxslərdə isə bu göstərici 73,73 milyon dollar (0,58 faiz) olub.
2012-ci ilin yanvar-iyun ayları ərzində idxal 4,46 milyon dollar təşkil edib ki, bu da 2011-ci ilin analoji dövrünə nisbətən 3,14 faiz çoxdur.
İdxal əməliyyatlarında dövlət sektorunun payı 901,62 milyon dollar (20,22 faiz), özəl sektorun payı 2,71 milyard dollar (74,66 faiz), fiziki şəxslərin payı isə 227,94 milyon dollar (5,11 faiz) təşkil edib.
2012-ci ilin yanvar-iyun aylarında Azərbaycandan 1714 növ məhsul ixrac edilib, ölkəyə isə 5548 növ məhsul gətirilib.
