Azərbaycan, Bakı, 10 sentyabr/Trend, müxbir E. İsmayılov/
Bakı Metropoliteninin 20 illik dövlət inkişaf proqramı çərçivəsində paytaxt ərazisinin 75 faizindən çoxu əhatə olunacaq. Trend-in məlumatına görə, bu barədə bazar ertəsi Bakı Metropoliteninin rəis müavini Arif Rəsulov "Tunel tikintisi və meqapolislərdə yeraltı infrastruktur" adlı beynəlxalq sərgi-konqresdə bildirib.
Onun sözlərinə görə, metronun inkişaf proqramı çərçivəsində mövcud iki xəttin genişləndirilməsi və yeni üç xəttin tikintisi planlaşdırılır. Proqramın reallaşdırılmasından sonra metro stansiyalarının sayı 76-ya, xətlərin uzunluğu isə 119 kilometrə çatacaq.
Metro stansiyalarının yeni xətlərinin çəkilməsi çərçivəsində yeddi vaqondan ibarət qatarların qəbulu nəzərdə tutulacaq. Onlar yeni texnologiyalarla təchiz ediləcək. Eskalatorların quraşdırılması ilə yanaşı, liftlərin quraşdırılması və onlardan əlilliyi olan şəxslərin istifadəsi üçün bütün şəraitin yaradılması planlaşdırılır. Metronun köhnə stansiyalarının yenidən qurulması, vaqon parkının yenilənməsi və digər işlər də aparılır.
Bakı Metropoliteni şəbəkəsinin genişləndirilməsi haqqında qərar paytaxt sakinlərinin artımı nəzərə alınaraq qəbul edilib. Xüsusən, Bakı Metropoliteni ildə 200 milyondan çox sərnişin daşıyır. Sutkada bu rəqəm 500 mini ötür, sutkalıq maksimum sərnişindaşıma həcmi 750 mini ötüb.
