Azərbaycan, Bakı, 22 sentyabr /Trend, müxbir A.Axundov/
Azərbaycan Dövlət Gömrük Komitəsi yanvar-avqust aylarında dünyanın 146 ölkəsi ilə aparılan xarici ticarət əməliyyatlarının yekunlarını elan edib. Bu barədə şənbə günü Trend-ə komitədən bildiriblər.
Ölkənin ümumi mal dövriyyəsi 21,84 milyard dollar təşkil edib ki, bu da ötən ilin analoji dövr göstəricisindən 7,6 faiz azdır.
Xarici ticarət əməliyyatlarında 9,81 milyard dollar həcmində müsbət saldo yaranıb.
Bu müddət ərzində xarici ticarət əməliyyatlarında 7276 hüquqi və fiziki şəxs qeydə alınıb. Onlardan 3381-i hüquqi, 3895-si isə fiziki şəxsdir.
2012-ci ilin ilk səkkiz ayı ərzində ölkənin ixrac əməliyyatları 15,83 milyard olub ki, bu da ötən ilin analoji dövrü ilə müqayisədə 11,07 faiz azdır.
İxracda dövlət sektorunun payı 14,96 milyard dollar (94,52 faiz), özəl sektorun payı 768,34 milyon dollar (4,85 faiz), fiziki şəxslərin payı isə 94,36 milyon dollar (0,6 faiz) təşkil edib.
Yanvar-avqustda idxal 6,02 milyard dollar olub ki, bu da ötən ilin müvafiq dövrü ilə müqayisədə 2,96 faiz çoxdur.
İdxal əməliyyatlarında dövlət sektorunun payı 1,21 milyard dollar (20,1 faiz), özəl sektor 4,53 milyard dollar (75,28 faiz), fiziki şəxslərin payı isə 278,73 milyon dollar (4,64 faiz) olub.
Yanvar-avqust ayları ərzində Azərbaycandan 1881 növdə mal ixrac, ölkəyə isə 5854 növdə mal idxal edilib.