Azərbaycan, Bakı, 6 fevral /Trend, müxbir A.Axundov/
Azərbaycan vergitutmanın sadələşdirilmiş rejimi üçün maksimum həddi azalda bilər. Trend-in məlumatına görə, bu barədə Vergilər Nazirliyinin Vergi siyasəti və strateji araşdırmalar baş idarəsinin rəisi Akif Musayevin çərşənbə günü rəsmi mətbuatda dərc edilmiş müsahibəsində deyilir.
Bu yaxınlaradək sadələşdirilmiş vergi rejimi 150 min manatlıq dövriyyəyə malik hüquqi şəxslərə və 90 minlik dövriyyəyə malik fiziki şəxslərə tətbiq edilirdi. Vergi Məcəlləsinə düzəlişlərin qüvvəyə minməsindən sonra, 2013-cü il yanvarın 1-dən bu hədd həm fiziki, həm də hüquqi şəxslər üçün eyni oldu və 120 min manat səviyyəsində müəyyən edildi.
"Ölkədə 480 min vergi ödəyicisinin qeydiyyata alınmasına baxmayaraq, onlardan yalnız 19 mini ƏDV ödəyiciləridir. Bu isə çox azdır", - Musayev bildirib.
Musayevin sözlərinə görə, bir çox beynəlxalq institutlar və vergi mütəxəssisləri vergitutmanın sadələşdirilmiş sisteminin tətbiqinə qarşı çıxış edirlər.