Azərbaycan, Bakı, 16 iyul /Trend, müxbir A.Axundov/
"PaşaBank" Gürcüstandakı filialının köməyi ilə bu ölkənin qiymətli kağızlar bazarına çıxmağı planlaşdırır. Trend-in məlumatına görə, bu barədə jurnalistlərə bankın İdarə Heyətinin sədri Fərid Axundov deyib.
"PaşaBank" Gürcüstandakı müştərilərinə marketmeyker xidmətləri göstərmək, onlara ölkə daxilində və xaricində, həmçinin Azərbaycanda investorlar tapmağa kömək etmək niyyətindədir.
Axundov bildirib: "Biz Gürcüstanın qiymətli kağızlar bazarını tənzimləyən ölkə qanunvericiliyinin öyrənilməsi üzrə fəal işlər aparırıq, mövcud emitentləri, eləcə də kimin nə iş görəcəyini öyrənirik. Yəni bütün istiqamətlər üzrə iş gedir".
Onun sözlərinə görə, bank bu sahədə kiçik iş təcrübəsinə malikdir və inkişaf etmək istəyi var: "Bu, Gürcüstanda da maraqlı olacaq. Hər halda Gürcüstanın potensial emitentlərinin artıq belə xidmətlərə böyük marağı var. Biz Gürcüstanda bu bazarın inkişafına nikbin baxırıq".
