Azərbaycan, Bakı, 9 sentyabr /Trend, müxbir A.Axundov/
"Paşa Bank" qrafiki qabaqlamaqla Gürcüstan bazarını mənimsəyir. Trend-in məlumatına görə, bunu bazar ertəsi bankın İdarə Heyətinin sədri Fərid Axundov mətbuat konfransında deyib.
Onun sözlərinə görə, ilkin plana əsasən, bankın Gürcüstandakı filialı ilin I yarısını 2 milyon lari (1,2 milyon dollar) həcmində zərərlə başa çatdırmalı idi: "Lakin zərər cəmi 0,5 milyon lari (0,3 milyon dollar) təşkil etdi".
F.Axundov qeyd edib ki, bank əməliyyatları təkcə xaricdə deyil, həm də ölkə daxilində genişləndirmək niyyətindədir: "Bank cari ilin sonunadək Gəncə və Zaqatala şəhərlərində biznes mərkəzləri yaratmaq istəyir".
O bildirib ki, biznes mərkəzləri geniş səlahiyyətlər, yaxşı infrastruktur, xidmətlərin geniş spektrini təqdim etmək baxımından filiallardan fərqlənirlər.