Azərbaycan, Bakı, 3 mart /Trend, müxbir E.Əliyev/
Azərbaycanlı sərmayəçilərin mikromaliyyəyə marağı getdikcə artır. Bu barədə bazar ertəsi Trend-ə Azərbaycan Mikromaliyyə Assosiasiyasının (AMA) sədri Süleyman Kələşov bildirib.
S.Kələşov qeyd edib ki, ölkədə bank olmayan kredit təşkilatlarının (BOKT) və digər mikromaliyyə qurumlarının kapitalının böyük hissəsini əcnəbi sərmayələr təşkil edir: "Bu aydındır, çünki ölkədə fəaliyyət göstərən "Finca Azerbaijan", yaxud "TBC Kredit" kimi iri təşkilatlar əcnəbi qurumlardır".
Onun sözlərinə görə, Azərbaycan kapitallı mikromaliyyə təşkilatlarının xüsusi çəkisi artacaq: "Fevralın ortalarında bizə daha bir qurum, il yarıma yaxın müddətdə bazarda fəaliyyət göstərən regional BOKT - "Maliyyə Resursları Mərkəzi" müraciət edib. Kapitalı təxminən 1,5 milyon manat olan təşkilatın nümayəndələri AMA-ya daxil olmaq xahişi ilə müraciət ediblər və müsbət cavab alıblar. Bu, rəqabətin genişlənməsindən, yerli sərmayəçilərin mikromaliyyə bazarına marağının artmasından xəbər verir və hesab edirəm ki, bu tendensiya gələcəkdə də saxlanacaq".
AMA-ya mikromaliyyə ilə məşğul olan 30 təşkilat daxildir. Onlardan səkkizi kommersiya bankı, 20-si BOKT və ikisi lizinq şirkətidir. Ümumilikdə ölkədə 43 bank və 148 BOKT fəaliyyət göstərir ki, onlardan 111-i kredit ittifaqıdır.
