Azərbaycan, Bakı, 21 aprel /Trend, müxbir E.Əliyev/
Azərbaycanda istehlak kreditləşməsinin məhdudlaşdırılması uzunmüddətli perspektivdə ölkə banklarına müsbət təsir göstərəcək. Bu barədə Trend-ə "Unibank"ın pərakəndə bank xidmətləri üzrə direktoru Xalid Əhədov bildirib.
X.Əhədov deyib ki, pərakəndə bazar, o cümlədən bank sənayesi artıq ölkəmizdə ikinci onillikdir ki, inkişaf edir: "Təbii ki, ümumilikdə ölkədə müxtəlif sahələr inkişaf etdiyi kimi, bazarda da oyun qaydaları dəyişir".
O, hesab edit ki, Mərkəzi Bankın qəbul etdiyi tədbirlər uzunmüddətli perspektivdə ölkə banklarına müsbət təsir göstərəcək: "Təbii ki, həmin tədbirlər tələbin azalmasına da təsir göstərir, amma bizim bank işlədiyimiz həmin yeni şərtlərdən maksimum hər şeyi "sıxmağa" çalışır".
Onun sözlərinə görə, bank xidmət şəbəkəsini genişləndirir, regionlarda fəaliyyətini qaydaya salır: "Biz biznesimizi təkcə coğrafi nöqteyi-nəzərdən deyil, həm də sahələr üzrə şaxələndiririk. Regionlara gəldikdə isə biz ilin sonunadək Xaçmazda və Şəkidə filial açmaq istəyirik. Onlar "Unibank"ın 37-ci və 38-ci filialları olacaqlar".
Martın 31-nə olan vəziyyətə görə Unibank-ın kredit portfeli 617,37 mln. manat olub ki, bunun da 76 faizi fiziki şəxslərə verilən kreditlərin payına düşüb. Ötən ilin analoji dövrü ilə müqayisədə bankın portfeli 41,6 faiz artıb.
