Azərbaycan, Bakı, 21 may /Trend, müxbir E.Əliyev/
Azərbaycan tərəfi Xudafərin gömrük postunun bərpası ilə bağlı İrandan konkret təklif almayıb. Bunu çərşənbə günü Trend-ə Azərbaycan Dövlət Gömrük Komitəsinin (DGK) sədri Aydın Əliyev deyib.
O bildirib: "İran tərəfi təşəbbüsümüzü dəstəkləməyə hazır olduğu barədə dəfələrlə bildirib. Buna baxmayaraq, Dövlət Komitəsinə indiyədək heç bir konkret təklif daxil olmayıb".
Dövlət Komitəsinin rəhbəri onu da bildirib ki, DGK əvvəlki kimi adıçəkilən buraxılış məntəqəsinin bərpa edilməsinə tərəfdardır.
Azərbaycan-İran sərhədində 4 - "Culfa", "Şahtaxtı" (İran tərəfdə - "Poldəşt"), "Biləsuvar" və "Astara" gömrük-buraxılış məntəqəsi fəaliyyət göstərir.