Azərbaycan, Bakı, 23 may /Trend, müxbir E.Əliyev/
2014-cü ilin yanvar-aprel aylarında Gürcüstan ixracının 20,2 faizi Azərbaycanın payına düşüb. Trend-in məlumatına görə, bu barədə Gürcüstan Milli Statistika Xidmətinin xarici ticarət haqqında hesabatında deyilir.
Hesabata əsasən, 2014-cü ilin ilk 4 ayında Gürcüstandan Azərbaycana 188,45 milyon dollar dəyərində mal ixrac olunub.
2013-cü ilin eyni dövrü ilə müqayisədə Azərbaycana ixracat 9,83 faiz azalıb. Müqayisə üçün ötən ilin yanvar-aprel aylarında Azərbaycana 208,99 milyon dollar dəyərində Gürcüstan malı ixrac olunub.
Hesabata əsasən, bu göstərici üzrə ikinci yeri Ermənistan tutur. İlin əvvəlindən bu ölkəyə 104,48 milyon dollar (ixracın ümumi həcminin 11,2 faizi) dəyərində Gürcüstan məhsulu ixrac edilib.
Gürcüstan mallarının ixracının həcmi üzrə 3-cü yeri Rusiya tutur. 2014-cü ilin yanvar-aprel aylarında Gürcüstan mallarının ixracının ümumi həcmindən 87,23 milyon dollar və ya 9,4 faizi Rusiyanın payına düşür.
Cari ilin ilk 4 ayının nəticəsinə əsasən, Gürcüstan və Azərbaycan arasında əmtəə dövriyyəsi 391,98 milyon dollar təşkil edib. Təqribən 3,44 milyard dollar olan Gürcüstanın xarici ticarət dövriyyəsinin 11,4 faizi Azərbaycanın payına düşür ki, bu da ötən ilin analoji dövrünün göstəricisini 14 faiz üstələyir.
