Azərbaycan, Bakı, 27 avqust /Trend/
Azərbaycanda bank hesabı açmadan 1 əməliyyat günü ərzində sərbəst qaydada ölkədən kənara köçürüləcək xarici valyutanın məbləği 10 min dollaradək artırılacaq.
Trend-in məlumatına görə, bu dəyişiklik Azərbaycan Mərkəzi Bankının (AMB) saytında yerləşdirilmiş "Azərbaycan Respublikasında xarici valyuta ilə əməliyyatların aparılması Qaydaları" layihəsində əks olunub.
Bu qayda rezident və qeyri-rezident fiziki şəxslərə şamil edilir.
"Azərbaycan Respublikasında rezidentlərin və qeyri-rezidentlərin valyuta əməliyyatları rejimi haqqında" mövcud qaydalara görə, fiziki şəxslər hesab açmadan 1000 dollar ekvivalentində məbləği xaricə göndərə bilərlər.
Yeni qaydalara əsasən, 50 min ABŞ dolları ekvivalentindən artıq vəsaitin valyuta əməliyyatları rezident və qeyri-rezident fiziki şəxslər tərəfindən Azərbaycandan kənarda yalnız bank hesabı açmaqla həyata keçirilə bilər.
Qaydalara görə, Azərbaycanda rezident və qeyri-rezident fiziki şəxslərin xeyrinə aparılan pul köçürmələri bank hesabı açmadan qeyri-məhdud məbləğdə bank və poçt operatorları tərəfindən qəbul edilir.
Fiziki şəxslərin xeyrinə xaricə köçürülən valyuta vəsaitləri bank hesabı açmadan nağd verilə və ya köçürmənin ünvanlandığı şəxsin göstərişi ilə onun hesabına yatırıla bilər.
Bu qaydalar rezidentlər və qeyri rezidentlər tərəfindən Azərbaycan bankları, xarici bankların yerli filialları və milli poçt operatoru vasitəsilə xarici valyuta ilə əməliyyat rejimini tənzimləyir.
