Azərbaycan, Bakı, 22 sentyabr /Trend, müxbir Azad Həsənli/
Azərbaycanda ən azı daha 3 biznes inkubatorun yaradılması planlaşdırılır. Bunu bazar ertəsi Trend-ə İqtisadiyyat və Sənaye Nazirliyi yanında Bakı Biznes Tədris Mərkəzinin direktoru Akif Fərruxov deyib.
Onun sözlərinə görə, onların Aran iqtisadi rayonunda, Balaxanı sənaye parkında, Sumqayıt kimya-sənaye parkında və digər ərazilərdə yaradılması nəzərdə tutulub.
A.Fərruxov qeyd edib ki, pilot layihə qismində ilk biznes inkubator Quba-Xaçmaz iqtisadi rayonunda yaradıldı: "Orada biznes inkubator üçün yerli Regional İnkişaf Mərkəzində müasir ofis avadanlıqları ilə təchiz olunmuş təqribən 500 kvadratmetr sahəsi olan 15 otaq ayrılıb. Sırada Aran iqtisadi rayonunda biznes inkubatorun yaradılması dayanır. Aran Regional İnkişaf Mərkəzinin açılışından sonra biznes inkubator orada da yaradılacaq".
2014-cü ilin sentyabr ayının 10-da Quba-Xaçmaz iqtisadi rayonunda ilk biznes inkubatorun açılışı oldu. Hazırda biznes inkubator fəaliyyətinin ilk mərhələsinə başlayıb.
A.Fərruxov bildirib ki, 3 ay ərzində biznes inkubatorda biznesin planlaşdırılması, təşkili və aparılması mərhələlərini tam əhatə edən 12 istiqamət üzrə kursların keçirilməsi planlaşdırılır: "Kurslara biznesin əsası, planlaşdırılması və təşkili, marketinq, menecment, logistika, işgüzar danışıqların aparılması və s. daxildir. Hər bir kurs 1 həftə davam edəcək. Kursları beynəlxalq sertifikata malik ekspertlərimiz aparcaqlar. Biz beynəlxalq ekspertləri də cəlb edirik".
Biznes inkubatorların iştirakçıları üçün növbəti 8 ay ərzində konsaltinq xidmətləri təşkil olunacaq.
Onun sözlərinə görə, müvafiq dövlət strukturlarının və özəl sektorun nümayəndələri onlarla məsləhətləşmələr aparacaqlar. Gələcəkdə biznes inkubatorların iştirakçıları digər ölkələrin biznes inkubatorlarında təcrübə keçəcəklər: "Biz Türkiyə və Almaniyada təcrübə keçirməyi planlaşdırırıq. İştirakçılar bu ölkələrdə təcrübə mübadiləsi aparacaq, sahibkarlarla işgüzar əlaqələr quracaqlar".
