Beynəlxalq Valyuta Fondu Azərbaycan hökumətinə "çirkli" pulların yuyulmasına qarşı mübarəzədə texniki yardım çərçivəsində memorandum təqdim edib. Bu barədə Trend ə məlumat verən Milli Bankın İdarə Heyətinin üzvü, işçi qrupun rəhbəri Rüfət Aslanlı bildirib ki ' Azərbaycan tərəfi də öz növbəsində Fonda Azərbaycanın yardım almaq istədiyi istiqamətlərlə bağlı öz təkliflərini təqdim edib.
R.Aslanlının sözlərinə görə, orada həm qanun yaradıcı, həm də institutisional istiqamətlərdə təkliflər göstərilib. Eyni zamanda, bu istiqamətlərdə fəaliyyəti ölkənin texniki yardım proqramı çərçivəsində kömək ala biləcəyi digər donorlarla əlaqələndirmək təklif olunur.
Bu gün ölkəyə müxtəlif istiqamətlərdə(treninqlərin keçirilməsində, qanunvericiliyin hazırlanmasında) yardım göstərən mənbələr mövcuddur. Onların arasında ABŞ hökumətinin, Avropa Şurasının ekspertlərinin, AYİB və s. dəstəyini xüsusi qeyd etmək lazımdır.
Bu gün Azərbaycana hüquqi sahədə, xüsusilə də qanunvericilik aktlarında dəyişikliklərin "Pulların yuyulmasına və terrorizmin maliyyələşdirilməsinə qarşı mübarizə barədə" qanun layihəsinin onun qüvvəyə minməsindən sonra uyğunlaşdırılmasına yardım göstərmək lazımdır. Bu qanun layihəsi üzrə hökumətlə razılaşma artıq başa çatdırılıb və Prezident Aparatına təqdim edilib.
