Quru rayonlarında kənd təsərrüfatı tədqiqatları üzrə Beynəlxalq mərkəzin (ICARDA) mütəxəssislərinin Bakıya səfəri gözlənilir. Kənd Təsərrüfatı Nazirliyi yanında elmi-aqrar mərkəzin beynəlxalq münasibətlər şöbəsindən Trend ə verilən xəbərə görə, ekspertlərdən biri Mikael Nacit artıq Bakıdadır, daha iki ekspert isə 2 gün ərzində gələcək.
Dənli və paxla bitkiləri üzrə mütəxəssislərin səfərinin məqsədi ICARDA tərəfindən təqdim olunmuş bitkilərin gələcək inkişafı ilə tanışlıqdır. Bu toxumlar elmi-aqrar mərkəzin Abşeron, Cəlilabad və Qobustandakı təcrübə stansiyalarında əkilib. Mütəxəssislər bu stansiylarda olacaq və qiymət verəcəklər. Bu iş uğurla nəticələnərsə, bu bitkilərin əkin sahəsi genişləndiriləcək.
Mütəxəssislər bir həftə ərzində Azərbaycanda olacaqlar.
Azərbaycan ICARDA ilə fəal şəkildə əməkdaşlıq edir. Ötən illərdə ICARDA-nın maliyyə dəstəyi ilə eroziya və suvarma üzrə elmi-texniki institut "Tərtər rayonundakı təcrübə sahəsində soya bitkilərinin intensiv əkilməsi üçün fermer təsərrüfatlarının iştirakı ilə təkmilləşdirilmiş suvarma texnologiyalarının yoxlanması", "Fermerlərin cəlb olunması ilə Şamaxı rayonundakı dağ yamaclarında meyvə bağlarının əkilmə texnologiyalarının tədqiqi" adlı bir neçə layihə həyata keçirib.
