Hesablama palatasının (HP) növbəti iclasında 2003-2005-ci illərdə və 2006-cı ilin cari dövründə dövlət büdcəsindən verilmiş dotasiyaların və vəsaitlərin xərclənməsi üzrə Xətai bələdiyyəsində keçirilmiş audit yekunlaşdırılıb. Trend in Hesablama palatasına istinadən verdiyi xəbərə görə, audit zamanı aşkar edilib ki, bələdiyyə büdcəsi iqtisadi əsaslandırma olmadan təsdiq edilib, fiziki şəxslərin əmlakı üzrə vergiödəyicilərinin uçotu aparılmayıb, ərazidəki avtomobil qarajları uçotdan yayındırılıb.
Bələdiyyənin ərazisində kommersiya obyektlərinin tikintisi üçün torpaq sahələrinin icarəsi üzrə müvafiq sazişlər bağlanıb və müqavilənin vaxtı uzadılmadığından, bələdiyyə büdcəsinə alınacaq vəsaitlərin yayındırılması hallarına yol verilib. Mühasibat uçotu tələblərə uyğun aparılmayıb. Torpaq sahələri ayrılan zaman normativ aktlara uyğun müəyyən edilmiş qaydalar pozulub, torpaqların icarəyə verilməsi üzrə artıq bağlanmış müqavilələrdə düzəlişlərin edilməsi faktları aşkar edilib, bələdiyyənin qərarı olmadan torpaq sahələri icarəyə verilib. Torpaq sahələrinin ayrılması zamanı müəyyən olunan qiymətlər bazar qiymətlərindən dəfələrlə az olub.
Bundan başqa, müvafiq icra hakimiyyəti orqanları tərəfindən Bələdiyyələrin mülkiyyətinə verilən torpaqlara aid sənədlər hazırlanmayıb. Bu günə kimi bələdiyyənin sərhədləri məlum deyil.
Auditin yekunlarına görə, sənədlər Nazirlər Kabinetinə, Dövlət Torpaq və Xəritəçəkmə Komitəsinə, Maliyyə Nazirliyinə, Bakı şəhər İcra Hakimiyyətinə, Auditorlar Palatasına və Baş Prokurorluğa göndərilib.