Əmək və Əhalinin Sosial Müdafiəsi Nazirliyinin məlumatlarına görə, 2007-ci ildə ünvanlı dövlət sosial yardım 171 min ailə və ya 800 min nəfəri əhatə edəcək. Əmək Nazirliyindən Trend ə verilən xəbərə görə, bu məqsədlər üçün 2007-ci ilin dövlət büdcəsində 78 mln. manat nəzərdə tutulub.
"Yaşayış minimumu və ehtiyac meyarları haqqında" təsdiq olunmuş Qanuna əsasən, ünvanlı dövlət sosial yardımı almaq üçün "ehtiyac meyarı"nın həddi 1 yanvar 2007-ci il tarixindən 35 manat, iyulun 1-dən isə - 40 manata qədər artırılacaq.
Əmək Nazirliyinin hesablamalarına görə, 2006-cı ilin yekunlarına görə 218 673 nəfər ünvanlı sosial yardım alır. Orta hesabla adambaşına 9,86 manat ünvanlı yardım düşür, ailəyə düşən orta aylıq məbləğ isə 44,28 manat təşkil edir. Respublika üzrə ümumi məbləğ ayda 10,852 mln. manat təşkil edir.
2006-cı ildə Əhalinin sosial müdafiəsi mərkəzinə ünvanlı sosial yardım almaq üçün cəmi 311 516 ailə müraciət edib, onlardan 77209-u qeydiyyata alınıb (müraciət edənlərin ümumi sayından 24,78%). Komissiyalar bu günə qədər 73993 sənədə baxıb (qeydiyyata alınmış sənədlərin ümumi sayından 95,83%) və nəticədə 48705 ailəyə ünvanlı sosial yardım təyin olunub.
2006-cı il dövlət büdcəsindən ünvanlı sosial yardımın verilməsi üçün 72 mln. manat ayrılıb, lakin yardımın iyulun 1-dən verilməyə başlandığını nəzərə alsaq, büdcə vəsaitlərinə qənaət olunub.
