Azərbaycan,Bakı/müxbir Trend Ü.İsmayılova/Kanadanın sığorta aktuariyi Jan Noel Martineu çərşənbə axşamı Azərbaycanın sığorta bazarı ilə tanışlıq üçün iki həftəlik səfərlə Bakıya gəlir. Bu barədə sığorta üzrə ixtisaslaşdırılmış Amerikanın ACDI/VOCA təşkilatının əməkdaşı Xəyal Quliyev bildirib.
ACDI/VOCA inkişaf etmiş ölkələrdə geniş miqyaslı iqtisadi artıma və vətəndaş cəmiyyətinin möhkəmləndirilməsinə şərait yaradan ABŞ-ın özəl qeyri-kommersiya təşkilatıdır. Quliyevin sözlərinə görə, aktuariy səfərinin ilk üç günündə Maliyyə Nazirliyində dövlət sığorta nəzarəti şöbəsinin müdiri Namiq Xəlilovla iş aparacaq. "Şirkətlərlə tanışlıq və bazarın problemləri ilə bağlı birgə iş aparılacaq", - deyə o bildirib.
Növbəti iki həftədə aktuariy Azərbaycanda seminarların keçirilməsi ilə bağlı planın işlənməsi ilə məşğul olacaq.
Maliyyə Nazirliyinin dövlət sığorta nəzarəti şöbəsinin müdiri Namiq Xəlilovun məlumatına əsasən, aktuariyin dəvət olunmasında məqsəd Azərbaycanda bu sahədə aktuariy və mütəxəssislər məktəbinin yaradılmasıdır.
Xəlilovun sözlərinə görə, layihəyə maliyyə yardımını ACDI/VOCA şirkəti göstərəcək.