Nazir müavini: "Azərbaycan İqtisadi İnkişaf Nazirliyi infilyasiya əleyhinə tədbirləri gücləndirir"

Azərbaycan, Bakı /müx. Trend İ.Xəlilova, P.Əliyeva/ Cümə axşamı iqtisadi inkişaf nazirinin müavini Niyazi Səfərov Lənkəranda kənd təsərrüfatı və turizmlə bağlı keçirilən regional konfransda bildirib ki, Azərbaycan İqtisadi İnkişaf Nazirliyində istehlak qiymətlərinin artımı ilə əlaqədar olaraq cənub regionunda monitorinq keçirilməsinin məqsədəuğunluğu nəzərdən keçiriləcək. Monitorinq infilyasiya əleyhinə görülən tədbirlər çərçivəsində aparılacaq.

İlin birinci yarısının yekunlarına dair hökumət tərəfindən keçirilən iclasda ölkə prezidenti İlham Əliyev yanvar-iyun ayları ərzində 16% təşkil edən infilyasiyanın artım tempi ilə bağlı narahatlığını bildirib. "Əhalinin gəlirlərinin 37%, məvaciblərinin isə 26% artımının infilyasiya göstəricisindən çox olmasına baxmayaraq, infilyasiya əleyhinə tədbirlər gücləndirilməlidir" - deyə prezident bildirib.

İnfilyasiya artımının obyektiv səbəblərindən biri kimi dünya bazarında neftin qiymətinin artması göstərilir ki, bu da Azərbaycan bazarının idxal məhsullarından asılı olması səbəbindən istehlak mallarının qiymətinin qalxmasına təsir göstərir. Digər bir səbəb isə ölkə büdcəsinin həddən artıq artmasıdır. Son 3-4 il ərzində Azərbaycan büdcəsi bir neçə dəfə artıb. Hazırda illik büdcə xərcləri 7,5 mlrd. dollar səviyyəsində müəyyən olunub, ümumi büdcə isə 9 mlrd. dollara yaxınlaşıb.