Azərbaycan, Bakı, 25 oktyabr/ Trend / Yanvar-sentyabrda Gürcüstan ərazisindən keçməklə Bakı - Tbilisi - Ceyhan (BTC) boru kəməri üzrə 195,83 mln. barel neft nəql edilib ki, bu da ötən ilin analoji dövr göstəricisindən 7 mln. barel və ya təxminən 4 faiz çoxdur, Gürcüstan Neft-Qaz Korporasiyasının (GOGC) rəsmi saytında yerləşdirilmiş məlumatda bildirilir.
BTC boru kəməri ilə "Azəri - Çıraq - Günəşli" yataqlarından hasil edilən yüngül Azərbaycan nefti nəql edilir.
Məlumatda bildirilir ki, sentyabrda BTC ilə tranzit avqustdakı 12,38 mln. barelə qarşı 19,02 mln.barel təşkil edib. Avqustda tranzitin azalmasına boru kəmərinin Türkiyə hissəsində baş verən yanğınla əlaqədar onun dayandırılması səbəb olub.
BTC neft kəmərinin ümumi uzunluğu 1768 kilometrdir. Bunun 443 km Azərabaycan, 249 km Gürcüstan, 1076 km Türkiyə ərazisindən keçir. BTC-nin tikintisi $4 mlrd. başa gəlib.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); ТРАО (6,53 faiz ); Eni (5 faiz ); Total (5 faiz ); İtochu (3,40 faiz ); İnpex (2,50 faiz ); ConocoPhillips (2,50 faiz ) və Amerada Hess (2,36 faiz ).
