Azərbaycan, Bakı, 31 oktyabr/ Trend , müxbir İ.Xəlilova/ "Dünya bazarlarında neftin qiymətinin azalması Azərbaycanın gəlirlərinə təsir göstərsə də, əvvəlki illərdə formalaşmış "ehtiyat yastığı" yalnız neft sektorundan ibarət olmayan Azərbaycan iqtisadiyyatını müdafiə edir", - Azərbaycan Milli Bankı İdarə Heyətinin sədr müavini Rüfət Aslanlı cümə günü bildirib.
"Azərbaycan neft ixracatçısıdır. Lakin regional inkişaf və kiçik və orta sahibkarlıq, əsasən, qeyri - neft sektorunda fəaliyyət göstərir. Bununla əlaqədar, neftin qiymət artımının başlanğıcından dövlətin əsas strategiyası iqtisadiyyatın şaxələnməsi olub, - Aslanlı bildirib. - Ötən dövr ərzində iqtisadiyyatın diversifikasiyası ölkənin gəlirlərini artırmağa imkan verib".
Onun sözlərinə görə, xammalın qiymətinin azalması qlobal resessiyanın yeganə amili deyil, bu həm də qlobal iqtisadi proseslərin nəticəsidir. Beynəlxalq ekspertlər bu hadisənin səbəblərini aydınlaşdırırlar.
Amerika dollarından iqtisadiyyatın bütün sahələrində, o cümlədən neftin alqı-satqısı üzrə əməliyyatlarda istifadə edilməsi və bütün maliyyə alətlərinin bu valyutada ifadə edilməsi nəticəsində, onların ümumi həcmi istehsal edilmiş mal və xidmətlərin həcmini bir neçə dəfə qabaqlayır.
"Bu, "qovuq" adlanır. Böyük gəlirlərin əldə edilməsi ilə əlaqədar onun şişirdilməsi bütün ölkələri qane edirdi, - sədr müavini bildirib. Hazırda əks proses başlayıb və suyun üzərindəki köpük yığılanda hamı sakitləşəcək. Lakin hər bir vəziyyətdən gəlirlə çıxmaq olar və biz böhranın üstünlüklərindən istifadə etməliyik".
Onun sözlərinə görə, hələ bir neçə ay əvvəl ərzaq təhlükəsizliyi və qiymət artımı ilə bağlı qlobal problem müşahidə edilirdisə, hazırda gündəlikdə dayanan əsas məsələ qlobal deflyasiyadır.
"Ödəmə qabiliyyətinin kütləvi surətdə azalması bazarda təklif artıqlığı təhlükəsi ilə qarşılaşacaq ki, bu da qiymətlərin azalmasına gətirəcək və bu artıq müşahidə edilir - Aslanlı vurğulayıb.- . Bu şəraitdə istehsalın maya dəyərinin azalması mümkündür. Avropanın əksər avtomobil istehsalçıları istehsalı bir neçə günlük bağlamaq haqqında qərar qəbul ediblər və ABŞ- da da şirkətlərin iflası müşahidə olunur".
İllərlə formalaşmış texnoloji proseslərin yeni şəraitə uyğunlaşdırılması üçün vaxt tələb olunacaq, - Milli Bankın İdarə Heyəti sədrinin müavini güman edir. Lakin Azərbaycanda ilkin rəqabət üçün üstünlüklər - elektrik enerjisinə tariflər, ucuz işçi qüvvəsi var.
"Bu, iqtisadiyyatın diversifikasiyası üçün stimullardan biridir və bu mövqedən çıxış etsək, o zaman fayda əldə edəcəyik", - Aslanlı bildirib.
Azərbaycanın maliyyə sektorunun xarici bazarlarda riskli maliyyə alətlərində yerləşdirilmiş aktivləri olmadığından, birbaşa itkilər yoxdur. Azərbaycan bazarı yüksək gəlirlilik baxımından xarici bazarlarla müqayisədə daha cəlbedici olub.
"Biz bu istiqamətdə də ehtiyatlı siyasət aparmışıq və AMB hədsiz fəallığın tənzimlənməsi mövqeyindən çıxış edib. Bununla əlaqədar, ölkənin bank sektorunda bu öhdəliklər 16-17 faizdən çox deyil və onların qaytarılması ilə bağlı problemlər yoxdur", - Aslanlı bildirib.
Müəlliflə əlaqə saxlamaq üçün elektron ünvan: [email protected]
