Azərbaycan, Bakı, 18 noyabr/ Trend , müxbir S.Əliyev/ "SOCAR Energy Georgia 2008-ci ildə Gürcüstan bazarında təqribən 350 min ton neft məhsul satmaq niyyətindədir ki, bu da 2007-ci ilin göstəricisinə nisbətdə demək olar ki, 3,5 dəfə çoxdur", - deyə çərşənbə axşamı SOCAR Energy Georgia-nın (Azərbaycan Dövlət Neft Şirkətinin törəmə şirkəti) rəhbəri Mahir Məmmədov bildirib.
Ən çox tədarük həcmi dizel yanacağının payına düşəcək, onun satışı üç dəfə artaraq 150 min tona çatacaq. Qalan həcm benzin, aviasiya kerosini və maye qazın payına düşəcək.
2009-cu ildə Gürcüstan bazarında neft məhsullarnın satışı üzrə 10 faizlik artım gözlənilir.
Hazırda SOCAR Energy Georgia Gürcüstan bazarında ay ərzində Azərbaycan istehsalı olan 15 min ton benzin, 16 min ton dizel yanacağı və min ton maye qazı satır. Azərbaycan benzini və dizeli Gürcüstan bazarının 60 faizini, maye qazı isə 40 faizini təmin edir.
SOCAR Georgia-nın həmtəsisçiləri: SOCAR - 51 faiz, Petro-Trans FZCO - 32,7 faiz və İvan Çxartişvili - 16,3 faiz.
Məqalə müəllifi ilə əlaqə ünvanı - [email protected]
