...

Bolqarıstan "Nabukko" layihəsinin realizəsində Misirin rolunu vacib hesab edir

Energetika Materials 4 Dekabr 2008 18:05 (UTC +04:00)

Azərbaycan, Bakı, 04 dekabr/ Trend / "Misir "Nabukko" qaz kəməri layihəsinin realizəsində vacib rol oynayacaq, - Bolqarıstanın iqtisadiyyat və enerji naziri Petar Dmitrov cümə axşamı bildirib, - Reuters yazır.

Dmitrov, Misirin neft naziri Sameh Fəhmi ilə görüşdə bildirib ki, Bolqarıstan 2011 - 2012 -ci illərdən etibarən, Misirdən ildə 1 mlrd. kubmetr qazın idxalına başlamaq istəyir.

Onun sözlərinə görə, tərəflər gələn ilə əməkdaşlıq üzrə memorandumun hazırlanması barədə razılığa gəliblər. Memoranduma mayeləşdirilmiş qazın mümkün tədarükü və bolqar şirkətlərin Misirin neft- qaz yataqlarının kəşfiyyatında iştirakı daxil olacaq.

"2009 - cu ilin fevralında iki ölkə arasında əməkdaşlıq haqqında memorandumun işlənilməsi üzrə işçi qrupu fəaliyyətə başlayır", - Bolqarıstanın iqtisadiyyat və enerji naziri vurğulayıb.

"İşçi qrupu qaz tədarükü imkanlarını axtaracaq. Bu gün 0,5 mlrd. kubmetrdən 1 mlrd. kubmetrədək qazdan söhbət gedir", - Fəhmi bildirib.

Bolqarıstanın qaza olan tələbatının 90 faizdən çoxunu Rusiyanın qaz inhisarçısı "Qazprom" təmin edir. Sofiya Azərbaycandan qaz idxalı üzrə də danışıqlar aparır.

Dmitrovun sözlərinə görə, Bolqarıstan Misir qazını mövcud Türkiyə -Yunanıstan - İtaliya boru kəməri ilə idxal edə bilər. Misir və Türkiyə arasında birləşdirici halqanın yaradılması "Nabukko" qaz kəmərinə Misirin tədarüklərinin təhlükəsizliyinin təmin edilməsi üçün mühüm əhəmiyyət daşıyır.

Fəhminin rəyinə görə, Misirin "Nabukko" qaz kəməri ilə hansı həcmdə qaz tədarük edəcəyini söyləmək hələ tezdir. "Biz bu layihəni çox diqqətlə müşahidə edirik və o, realizə edilən kimi, tərəfdaşlarımızla nəinki Misir, həm də bütün regiondan qaz tədarükləri barədə danışıqlara başlayacağıq", - Fəhmi yekunlaşdırıb.

Misir prezidenti Hüsnü Mübarək, "Nabukko" layihəsinin sürətləndirilməsi məsələsinin müzakirəsi məqsədilə apreldə Bolqarıstanda keçiriləcək dövlət başçılarının sammitinə dəvət olunub.

Avropa İttifaqı və ABŞ -ın dəstəklədiyi "Nabukko" qaz kəməri layihəsi Azərbaycan və Mərkəzi Asiyadan Aİ ölkələrinə qaz tədarükünü nəzərdə tutur.

Dəyəri $12,4 mlrd. olan "Nabukko" qaz kəmərinin çəkilməsi 2010 - cu ilə təyin edilib. Boru kəmərinin maksimal ötürmə gücü ildə 31 mlrd. kubmetr olacaq. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər birinin bərabər payı var - 16,67 faiz.

Müəlliflə əlaqə saxlamaq üçün elektron ünvan: [email protected]

Xəbər lenti

Xəbər lenti