Azərbaycan, Naxçıvan, 23 dekabr / Trend , müxbir E.Məmmədov/ Naxçıvan Muxtar Respublikasının Culfa rayonunda təqribən 100 il əvvəl tikilmiş Dəmiryol Stansiyasının yenidən qurulması işləri başa çatdırılıb. Culfa Dəmiryol Stansiyasının vağzal binası, arxitekturası qorunmaqla, müasirləşdirilib.
Azərbaycan Dövlət Dəmiryol İdarəsinin Naxçıvan Hissəsinin rəisi Mahir Əliyevin bildirdiyinə görə, stansiyanın idarəetmə mərkəzi, bərpa qatarının inzibati və yardımçı binaları müasir standartlara uyğun yenidən qurulub, elektrovoz və qaldırıcı kran təmir olunub.
Vağzalda 22 iş otağı, sərnişinlərin gözləmə zalı, kassalar və restoran yenidən qurulub.
Açılışda iştirak edən NMR Ali Məclisinin sədri Vasif Talıbov dəmiryol stansiyasına iki "Şevrolet-Niva" markalı xidməti avtomobili bağışlayıb.
Hazırda daxili sərnişin daşımalarında istifadə edilən Culfa Dəmiryol Stansiyasından müxtəlif təyinatlı 60 yoldan istifadə edilir.
