Azərbaycan, Bakı, 02 iyun / Trend , müxbir S.Əliyev /
"Xəzər dənizinin Azərbaycan sektorundakı "İnam" perspektivli neft-qaz strukturu üzrə tərəfdaşlar PSA tipli müqaviləni ləğv edib və layihənin fəaliyyətini dayandırıblar", - "İnam"ın səhmdarı olan SOCAR şirkətinin yüksək vəzifəli nümayəndəsi deyib.
"İnam"dakı kəşfiyyat qazma işlərinin yekununa əsasən, burada karbohidrogenlərin kommersiya cəhətdən cəlbedici ehtiyatlara malik olmaması aşkar olunub.
"İnam" üzrə müqavilənin ləğv edilməsinə səbəb, strukturda həyata keçirilmiş kəşfiyyat işlərinin yekunlarına əsasən, kommersiya ehtiyatlarının üzə çıxarılması üçün yetərli tədqiqat informasiyasının olmaması olub", - SOCAR-ın yüksək vəzifəli nümayəndəsi bildirib.
"İnam" layihəsinin iştirakçıları ARDNŞ (50 faiz), BP (layihənin operatoru, 25 faiz), Koreya milli neft şirkəti (20 faiz) və Shell şirkətidir (5 faiz). Xəzərin Azərbaycan sektorundakı "İnam" dəniz strukturunda kəşfiyyat xarakterli qazma işləri kommersiya məqsədli karbohidrogen ehtiyatı aşkar etməyib. Hələ ötən il hökumətdən bildirmişdilər ki, "İnam" layihəsinin operatoru olan BP şirkəti bu sahədəki ikinci kəşfiyyat quyusunu ləğv edir. Şirkət quyunun qazılması zamanı demək olar ki, 5350 m dərinliyində layihə dərinliyinə çatmış, lakin kommersiya məqsədli karobhidrogen ehtiyatları aşkar etməmişdi.
Bu struktur üzrə PSA müqaviləsinin öhdəliklərinə görə, strukturda iki kəşfiyyat quyusu qazılmalı idi. 2001-ci ildə strukturda layihə dərinliyi 5025 metr olan birinci İNX-1 kəşfiyyat quyusunun qazılması aparılıb. Lakin quyuda qəza baş verib və bundan sonra o bağlanıb. Bu, quyu uzrə öhdəliklərin yerinə yetirilməsi kimi hesablanıb. Beləliklə, şirkətin bütün kəşfiyyat öhdəlikləri yerinə yetirilib.
Quyu Bakıdan 140 kilometr məsafədə yerləşən və təqribən 225 kvadrat kilometr sahəni əhatə edən müqavilə sahəsində qazılıb. Müqavilə sahəsində suyun dərinliyi şimalda 45 metrdən cənubdə 200 metrədək dəyişir. "İnam bankası"nın minimal dərinliyi dörd metrdir.
Məqalə müəllifi ilə əlaqə ünvanı: [email protected]
