Azərbaycan, Bakı, 01 avqust / Trend , müxbir E.İsmayılov /
"ARDNŞ 2010-cu ilin martında Zərdab, Şıxbağı və şərqi Şıxbağı quru ərazilərində ikiölçülü geofiziki tədqiqatların aparılması nəticəsində əldə olunmuş məlumatların işlənməsi və interpretasiyası üzrə işləri başa çatdırmağı planlaşdırır", - şirkətdə işlərə yaxın mənbə deyib.
Mənbənin sözlərinə görə, ərazilərdəki 2D tədqiqatlarının avqustun sonuna qədər başa çatdırılması planlaşdırılır.
"Ərazilərdə səhra çalışmaları davam etdirilir. Məlumatların işlənmə və interpretasiya prosesi, həmçinin görülən işlər üzrə hesabatın hazırlanmasının gələn ilin martına qədər tam başa çatdırılması planlaşdırılıb", - mənbə bildirib. 2D-nin başa çatmasından sonra əldə olunan məlumatların işlənməsi və interpretasiyası başlanacaq.
İşlərin aparılmasında əsas məqsəd tədqiq olunan ərazilərin geoloji quruluşunun dəqiqləşdirilməsi və onların neft-qazlılığının proqnozlaşdırılmasıdır.
Bir müddət əvvəl mənbədən bildirilmişdi ki, bu ərazilərdə səhra çalışmaları apreldə başlayıb və ümumi dərinlik nöqtəsi, qırılan dalğa və qravimetriya metodları ilə aparılır.
İnterpretasiya üzrə işlərin başa çatdırılmasından sonra görülən işlər sifarişçi tərəf olan "Azneft" İstehsalat Birliyinə təqdim olunacaq. İB ARDNŞ-nin tərkibinə daxildir.
Azərbaycanda 57 neft-qaz yatağı var ki, onlardan 18-i dənizdə yerləşir. ARDNŞ-nin əməkdaş ştatı 62 min nəfəri ötür.
Məqalə müəllifi ilə əlaqə ünvanı: [email protected]