Azərbaycan, Bakı, 9 noyabr / Trend , müxbir E.İsmayılov/
ARDNŞ Rusiyanın qaz inhisarçısı "Qazprom"la bağlanan müqavilə çərçivəsində Rusiyaya 500 milyon kubmetrdən az olmayaraq qaz tədarük edəcək, ARDNŞ-ın yüksək vəzifəli nümayəndəsi deyib.
"Düşünürəm ki, gələn il Rusiyaya 500 milyon kubmetr hüdüdlarında qaz tədarük ediləcək", - ARDNŞ-ın nümayəndəsi deyib.
Onun fikrincə, şirkətin elə birinci ildən Rusiayaya ixrac edilən qaz tədarükünü bir neçə dəfə artırmaq imkanı olacaq.
ARDNŞ-ın prezidenti Rövnəq Abdullayev əvvəllər deyib ki, Azərbaycan qazının 2010-cu ildən Rusiyaya ixracına başlanılması üçün boru kəməri infrastrukturu hazırlanıb. Qazıməmməd-Mozdok boru kəmərinin hərəkət istiqaməti dəyişdirilib və onunla texniki olaraq hər il təxminən yeddi milyard kubmetr qaz ötürmək olar, əvvəl bu göstərici beş milyard kubmetr təşkil edirdi.
Oktyabrın 14-də Bakıda ARDNŞ və Rusiyanın "Qazprom" şirkəti Azərbaycan qazının Rusiyaya tədarükü barədə ortamüddətli müqavilə imzalayıblar. Müqavilə 2010-2014-cü illəri əhatə edir. Müqavilənin şərtləri hər il 500 milyon kubmetrdən az olmayan qaz həcminin Rusiyaya tədarükünü nəzərdə tutur. Müqavilədə qaz tədarükünün həcminin hüdudları göstərilməyib. ARDNŞ yarım ildən sonra əkstərəfi təadrük edə biləcəyi qazın həcmi barədə xəbər verəcək.
Məqalə müəllifi ilə əlaqə ünvanı: [email protected]
