Gürcüstan, Tbilisi, 24 mart / Trend , müxbir N.Kirsxaliya/
Qazın mayeləşdirilməsi üzrə zavodun tikintisi üçün bir neçə variant nəzərdən keçirilir. Bu barədə çərşənbə günü Gürcüstanın energetika nazirinin müavini Mariam Valişvili deyib.
"Qaz terminalı Supsa, Poti və Kulevi limanlarında tikilə bilər - nazir müavini deyib. - Yerin seçilməsi layihənin kommersiya komponentindən asılıdır".
Valişvili qeyd edib ki, layihə çərçivəsində Gürcüstan, Azərbaycan və Rumıniya arasında fəal əməkdaşlıq gedir və tərəflər memorandumun rəsmiləşdirilməsi mərhələsindədir.
Layihə Azərbaycandan Qara dənizə qaz kəmərinin, Gürcüstanın Qara dəniz sahilində qazın mayeləşdirilməsi üzrə zavodun inşasını və Rumıniyaya maye qazın nəqlini nəzərdə tutur.
Mövcud məlumata görə, Gürcüstan, Azərbaycan və Rumıniya arasında layihə üzrə memorandumun rəsmiləşdirilməsi martın axırında Buxarestdə planlaşdırılıb.
Layihənin büdcəsi təxminən 4-6 milyard avro təşkil edir.
Gürcüstan və Rumıniya arasında energetika sahəsində əməkdaşlıq barədə protokol 2009-cu ilin oktyabrında Tbilisidə imzalanıb.
