Azərbaycan, Bakı, 5 may /Trend, müxbir E.İsmayılov/
ARDNŞ bu ilin yanvar-aprel aylarında "Bakı-Novorossiysk" neft kəməri vasitəsilə 2009-cu ilin analoji dövründə olan 824 min tonla müqayisədə, təqribən, 583,35 min ton neft ixrac edib. Bu barədə ARDNŞ-in məlumatında deyilir. Bu il bu marşrut üzrə 2,25 milyon ton neft nəql olunması planlaşdırılır.
Apreldə neft kəməri ilə 2009-cu ildəki 224 min tona nisbətdə, təqribən, 134,57 min ton neft nəql olunub.
ARDNŞ "Bakı-Novorossiysk" neft kəməri vasitəsilə 2008-ci ildəki 1,2 milyon tona nisbətdə 2009-cu ildə, təqribən, 2,5 milyon ton neft nəql edib. 2007-ci ildə bu marşrut üzrə, təxminən, 1,2 milyon neft nəql olunub ki, bu da 2006-cı ilin analoji göstəricisi ilə eynidir. 2005-ci ildə "Bakı-Novorossiysk" kəməri ilə ixrac 1,6 milyon ton neft təşkil edib.
ARDNŞ Novorossiysk vasitəsilə şəxsi yataqlarından hasil edilən neftin və Azərbaycanda quruda fəaliyyət göstərən birgə müəssisə və əməliyyat şirkətlərinin neftinin daşınmasını həyata keçirir.
Bu gün "Bakı-Novorossiysk" boru kəməri vasitəsilə neftin nəqli zamanı Azərbaycan Novorossiysk limanında Urals markalı neft əldə edir.
"Bakı-Novorossiysk" boru kəmərinin operatoru 2007-ci ilin sonunadək ABƏŞ olub, sonradan bu funksiyanı ARDNŞ-ə verib.
