Türkmənistan, Aşqabad, 16 iyun /Trend, müxbir H.Həsənov/
ARDNŞ (Azərbaycan Respublikası Dövlət Neft Şirkəti) və 1996-cı ildən Xəzər dənizinin Türkmənistan sektorunda neft hasil edən "Dragon Oil" (Birləşmiş Ərəb Əmirlikləri) şirkəti Bakı limanı vasitəsilə xammalın dünya bazarlarına nəqli üzrə saziş imzalayıblar. Bu barədə "Dragon Oil" şirkətinin məlumatında deyilir.
"Dragon Oil" şirkətinin əsas marketinq və kommersiya vəzifəsi münasib bazar qiymətlərinə nail olmaqla, dünya bazarlarına fasiləsiz satış və tədarükün təhlükəsiz təmin edilməsidir. "Mən "Dragon Oil" şirkətinin özünü etibarlı işgüzar tərəfdaş kimi göstərən ARDNŞ ilə saziş bağlamasına şadam", - "Dragon Oil"un baş direktoru Əbdül Cəlil Al Xəlifə deyib.
Məlumatda göstərilir ki, şirkət neft ixracı üçün alternativ marşrutları tədqiq etməkdə davam edəcək.
Şirkət əvvəllər əsasən İran vasitəsilə cənub marşrutundan "swap" tədarük sistemi üzrə istifadə edib. 2010-cu il martın sonunda İran Milli Neft Şirkəti (National Iranian Oil Company - NIOС) ilə xam neftin mübadiləsi üzrə sazişin müddəti başa çatıb. Cari ilin əvvəlində saziş ilin sonunadək uzadılıb. Gələcək fəaliyyətlə bağlı danışıqlar hələ ki bitməyib.
"Dragon Oil" ilin birinci rübündə iki milyon barel neft satıb ki, bu da ötən ilin müvafiq dövrü ilə müqayisədə 20 faiz azdır. 2,5 milyon barel isə ixrac edilib.
"Dragon Oil"da səhmələr paketinə Emirates National Oil Company (ENOC) malikdir. Ona Dubay Əmirliyinin hökuməti sahiblik edir. Türkmənistan hökuməti ilə saziş (PSA) 25 il müddətinə 1996-cı ildə imzalanıb.
Sazişə Xəzər dənizindəki iki qaz yatağı - "Ceytun" və "Ciqalıbeq" daxildir. Müstəqil auditorun məlumatına görə, bu blokun təsdiq edilən karbohidrogen ehtiyatları 636 milyon barel neft təşkil edir. Qaz ehtiyatı ilə proqnozlar 3,2 trilyon kubfut səviyyəsində qiymətləndirilir.
