Azərbaycan, Bakı, 31 iyul /Trend /
Azərbaycan Dövlət Neft Akademiyasının bu il təhsilini başa vuran bir qrup məzunu ARDNŞ-in (Dövlət Neft Şirkəti) "Azərikimya" İstehsalat Birliyinin (İB) Etilen-polietilen zavodunun müvafiq istehsalat sahələrində əmək fəaliyyətinə başlayıblar. Bu barədə ARDNŞ-in məlumatında deyilir.
Azərikimya" İB ilə Neft Akademiyası arasında cari ilin iyun ayının əvvəllərində əldə olunmuş razılığa və imzalanmış müqaviləyə əsasən Birliyin çoxillik istehsalat təcrübəsinə malik mütəxəssislərindən təşkil olunmuş komissiya iki mərhələ üzrə keçirdiyi müsabiqə nəticəsində 8 nəfər məzunun kimya müəssisələrində işə götürülməsi haqda qərar verilib.
Bu günlərdə həmin məzunlardan dördü (digər 4 gənc hərbi xidmətə yola düşüblər) Etilen-polietilen zavodunun istehsalat və sexlərinə işə qəbul olunmuşlar. Müsabiqədə yüksək bal toplamış məzunlardan Rauf Hacıyev və Nəcəf Səfərli Etilen-polietilen zavodunun Buxar-generator kompleksində mühəndis vəzifəsində işə başlamışlar. Tariyel Ramazanov əmək fəaliyyətinə həmin müəssisənin qazayırma sexinin texnoloqu kimi başlamışdır. Neft Akademiyasının digər məzunu Anar Şıxəliyevin əmək kitabçasında isə ilk iş yeri kimi sintez istehsalatı göstəriləcəkdir. Bu məzunların hər biri çalışdıqları sahələrdə iki ay ərzində çoxillik iş təcrübəsinə malik mütəxəssislərin nəzarəti altında işləməklə təcrübə əldə edəcəklər.
İşə başlamazdan əvvəl gənc mütəxəssislər ilk olaraq "Azərikimya" İB-nin rəhbərliyi tərəfindən qəbul olunublar. Daha sonra gənc kimyaçıların hər biri ilə fərdi söhbətlər aparılıb və onlar işləyəcəkləri istehsalat sahələri və sexlərlə, müvafiq spesifik istehsalat xüsusiyyətləri ilə yaxından tanış olublar.
