Azərbaycan, Bakı, 10 avqust /Trend/
Hazırda İran qazının Avropaya nəqlində üstünlük Türkiyə marşrutuna verilir, lakin Ukraynanın rəsmi şəxsləri də İran qazının Avropa İttifaqına ixrac etməyə hazır olduqlarını bildiriblər. Bu barədə İran qazının ixracına məsul olan Əsgər Süheylipur deyib. Xəbəri "SHANA" agentliyi yayıb.
"İran qazının Avropaya Azərbaycan, Gürcüstan və Ukrayna vasitəsilə nəqli alternativ marşrut ola bilər", - Süheylipur qeyd edib.
Onun sözlərinə görə, hazırda İran öz qazının Avropaya nəqli ilə bağlı Türkiyə ilə yanaşı, digər variantlar üzrə də ekspert tədqiqatları aparır.
Hazırda İranda dörd xəzəryanı ölkənin iştirakı ilə "swap" əməliyyatlarının və qaz nəqlinin həyata keçirilməsi üçün bütün lazımi şərait var.
Süheylipur əlavə edib ki, İran və Azərbaycan arasında qaz üzrə "swap" əməliyyatlarda heç bir problem yoxdur.
Azərbaycan İrana qaz tədarük edir. İran isə öz növbəsində, tədarük edilən qazı Ermənistan-Azərbaycan, Dağlıq Qarabağ münaqişəsi nəticəsində blokadada olan Naxçıvan Muxtar Respublikasına ötürür.
