Azərbaycan, Bakı, 13 sentyabr /Trend, müxbir E.İsmayılov/
АGRI (Azerbaijan-Georgia-Romania Interconnector) qaz nəqli layihəsi Avropa İttifaqına təbii qaz ixracının şaxələndirilməsinə imkan verəcək. Bu barədə bazar ertəsi Gürcüstanın energetika naziri Aleksandr Xetaquri Bakıda jurnalistlərə bildirib.
"Gələcəkdə bu layihə genişləndiriləcək və bu, Avropa İttifaqı tərəfindən təbii qaz ixracının şaxələndirilməsi üçün "ilk qaranquş" olacaq", - Xetaquri bildirib.
O, Macarıstanın layihəyə qoşulduğunu və nəticədə Aİ-nin iki ölkəsinin bu layihə çərçivəsində qaz alacağını qeyd edib.
Sabah Bakıda Azərbaycan, Gürcüstan və Rumıniya rəhbərlərinin görüşünün keçiriləcəyi və bunun yekunu olaraq AGRI layihəsi üzrə Bakı bəyannaməsinin imzalanacağı gözlənilir.
AGRI - maye qazın Avropaya nəqli üzrə Azərbaycan-Gürcüstan-Rumıniya layihəsidir.
Mayın 12-də Azərbaycan, Rumıniya və Gürcüstan Tbilisidə bu layihənin həyata keçirilməsi üzrə birgə müəssisənin yaradılması barədə protokol imzalayıblar. Birgə müəssisə mövcud layihənin icraçısı kimi çıxış edəcək, podratçı şirkətin seçilməsi və maliyyələşdirmənin cəlb edilməsi üzrə tenderin elan olunması üçün bütün lazımi tədbirləri həyata keçirəcək.
Aprelin 13-də tərəflər "Maye qaz və onun nəqli sahəsində əməkdaşlıq haqqında" memorandum imzalayıblar.
Azərbaycan maye qazının Rumıniyaya nəqli layihəsi maye qaz üçün iki terminalın Gürcüstan və Rumıniyada inşasını nəzərdə tutur. İlkin məlumatlara görə, layihənin dəyəri 4-6 milyard avro təşkil edir.
Layihə Azərbaycan qazının Gürcüstanın Qara dəniz sahilində qaz kəməri üzrə nəqlini nəzərdə tutur ki, bu qaz da xüsusi terminalda mayeləşdirilərək tankerlərlə Rumıniyanın Konstansa limanı terminalında nəql olunacaq. Gələcəkdə maye qaz təbii qaz halına gətirilərək, Rumıniya və digər Avropa ölkələrinin qaz tələbatını ödəmək üçün istiqamətlənəcək.