Azərbaycan, Bakı, 17 yanvar /Trend, müxbir A.Axundov/
2010-cu ildə Türkiyədə qaz istehlakı azalıb ki, buna görə də Türkiyənin iri qaz inhisarçısı BOTAŞ şirkəti "take or pay" (al və ödə) müqavilələri üzrə 4 milyard kubmetr qaza görə təxminən 1,4 milyard dollar ödəyəcək. Bu barədə bazar ertəsi "Zaman" qəzeti Türkiyənin Energetika Nazirliyi və BOTAŞ şirkətindəki mənbəyə istinadən məlumat verib.
Türkiyə 2010-cu ildə alınmamış qazın dəyərinin çox hissəsini Rusiyaya, az hissəsini isə Azərbaycana ödəyəcək.
Azərbaycan ilə razılığa əsasən, bu qazın dəyərinin 80 faizi nağd, qalan hissəsi isə qazla ödənilir. Azərbaycana dəyərin məbləği 2014-cü ilədək ödənilməlidir. Alınmayan qaza görə ödənişin həcmi göstərilmir.
2010-cu ildə BOTAŞ qazı 345 dollara alıb. Digər tərəfdən, qaydalara əsasən, satılmayan qazın dəyərinin 75-80 faizi nağd, 20-25 faizi qazla ödənilir. Beləliklə, dəyəri 320 dollara olan təbii qaz məhsul şəklində qaytarılacaq.
2008-ci ildə Türkiyədə qazın qiymətinin kəskin artması və kifayət qədər isti keçən qış son illər bu ölkədə qaz istehlakı faktına güclü təsir göstərib.
2008-ci ildə Türkiyədə qazın istehlak qiyməti 89 faiz artıb, bu isə abonentləri qaz istehlakını azaltmağa, sənaye sektorunu isə alternativ enerji mənbələrinə əl atmağa məcbur edib. Nəticədə BOTAŞ istehlak bazarında sata bilmədiyi qaza görə özü ödəniş etmək məcburiyyətində qalıb. 2008-ci ildə BOTAŞ belə qaza görə 700 milyon dollar, 2009-cu ildə isə 600 milyon dollar ödəyib.
