Azərbaycan, Bakı, 1 fevral /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) Rusiyanın "Qazprom" şirkəti ilə imzalanmış ortamüddətli müqaviləyə əlavəyə uyğun olaraq, Rusiyaya ildə iki milyard kubmetr qaz tədarükünü həyata keçirir. Bu barədə çərşənbə axşamı ARDNŞ-dən məlumat verilib.
Onun sözlərinə görə, hazırda ARDNŞ hər gün Rusiyaya altı milyon kubmetr qaz tədarük edir. Ötən il ARDNŞ Rusiyaya sutkada orta hesabla üç milyon kubmetr qaz nəql edib.
2010-cu ildə ARDNŞ Rusiyaya 799,75 milyon kubmetr qaz ixrac edib. Ötən ilin dekabrında bu ölkəyə 40,32 milyon kubmetrə yaxın Azərbaycan qazı ixrac olunub.
Azərbaycan qazının Rusiyaya alış-satışı barədə ortamüddətli müqavilə (uzadılma imkanı ilə) 2009-cu il oktyabrın 14-də ARDNŞ və "Qazprom" arasında imzalanıb. 2010-cu il sentyabrın əvvəlində Bakıda imzalanmış müqaviləyə əlavəyə əsasən 2011-ci ildə "Qazprom" iki milyard kubmetr, 2012-ci ildə isə iki milyard kubmetrdən çox qaz alacaq.
Azərbaycan qazının Rusiyaya nəqli ötən il yanvarın 1-dən başlayıb.