Azərbaycan, Bakı, 11 aprel /Trend, müxbir E.İsmayılov/
ARDNŞ "Bahar Energy Limited" şirkəti üçün ikiölçülü geofiziki tədqiqatlar çərçivəsində işləri davam etdirib. Bu barədə bazar ertəsi Trend-ə ARDNŞ-dəki mənbə deyib.
Onun sözlərinə görə, bu ərazidə işlərin bir qismi artıq əvvəllər görülüb.
"İşlərin başaçatma müddəti barədə danışmaq çətindir. Çünki bütün işlər dənizdə aparılır və hər şey hava şəraitindən asılı olacaq", - mənbə əlavə edib.
İşlər "Bahar-2" perspektiv strukturu ilə "Qum Dəniz" yatağı arasındakı geofiziki tədqiqatları nəzərdə tutur.
Bundan əvvəl ARDNŞ "Bahar Energy Limited" şirkəti ilə Xəzər dənizinin Azərbaycan sektorunda yerləşən "Bahar" və "Qum Dəniz" dəniz yataqlarının daxil olduğu blokun kəşfiyyatına, reabilitasiyasına, işlənməsinə və hasilatına dair PSA (hasilatın pay bölgüsü) tipli müqavilə imzalayıb. Müqavilə artıq Azərbaycan Milli Məclisi tərəfindən təsdiq edilib.
ARDNŞ ilə "Bahar Energy Limited" şirkəti arasında imzalanan müqavilənin ikinci hissəsində "Bahar-2" strukturunda kəşfiyyat işlərinin aparılması nəzərdə tutulur. Üç il müddətində bir kəşfiyyat quyusunun qazılması planlaşdırılır. Əgər ehtiyac yaranarsa, dördüncü il daha bir quyu qazıla bilər. "Bahar Energy Limited"in bu müqaviləyə qoyacağı investisiyaların həcmi ilkin hesablamalara görə, bir milyard dollar təşkil edəcək.
