Azərbaycan, Bakı, 5 fevral /Trend, müxbir E.İsmayılov/
Azərbaycanda qazlaşdırılmış rayonların sayı 67-yə çatıb. Trend-in məlumatına görə, bu barədə Azərbaycanın energetika naziri Natiq Əliyevin çərşənbə günü "Azərbaycan" qəzetində dərc olunmuş məqaləsində deyilir.
Nazir yazır ki, müxtəlif regionlarda qaz təchizatının bərpası əhaliyə yanacağın başqa növlərinə sərf etdiyi vəsaitə qənaət etməyə imkan yaradıb.
Məqalədə qeyd edildiyi kimi, 2013-cü ildə ölkədə qazlaşdırmanın səviyyəsinin artırılması və qaz təchizatının yaxşılaşdırılması üzrə görülən işlər çərçivəsində 9 min kilometr qaz kəməri çəkilib. Azərbaycanda qazlaşdırmanın səviyyəsi 90 faizə (Ermənistanın işğal etdiyi rayonlar istisna olmaqla) çatıb.
N.Əliyev yazır ki, hazırda Bakıda qazlaşdırmanın səviyyəsi 96,3 faiz, regionlarda - 65,4 faiz, abonentlərin sayğaclarla təmin edilməsi səviyyəsi isə 99 faizə çatıb.
İndiyədək Azərbaycanın qaz abonentləri 500 mindən çox smart-kart tipli sayğacla təmin olunub.
Qaz abonentlərinin ümumi sayı artıq 1,6 milyonu ötüb ki, onlardan 1,58 milyonu əhali kateqoriyasından olan abonentlərdir.
