Bakı. Trend:
İon-Adriatik boru kəmərinin (IAP) tikintisi 2028-ci ilin sonunadək və ya 2029-cu il ərzində yekunlaşa bilər.
Trend xəbər verir ki, Xorvatiyanın layihədə iştirak edən "Plinacro" şirkətinin məlumatında işlərin COVID-19 pandemiyasına qədərki sürətlə davam edəcəyi təqdirdə bunun mümkün olacağı qeyd edilib.
Bundan başqa, Xorvatiya, Monteneqro, Albaniya, Bosniya və Herseqovinanın iştirakı ilə layihələrin idarə olunması üzrə birgə şirkətin 2023-cü ilin sonunadək yaradılacağı gözlənilir. Şirkətin baş ofisi Xorvatiyanın Split şəhərində yerləşəcək.
"Plinacro"dan verilən məlumata görə, qaz kəmərinin Xorvatiya hissəsinin inşasına hazırlıq artıq qabaqcıl mərhələdədir.
"Hazırda layihə sənədlərinin hazırlanmasına 3 milyon avro investisiya qoymuşuq. Artıq birinci hissənin tikintisi üçün icazə almışıq və ikinci hissənin tikintisi üçün bir neçə ay sonra icazə alacağımıza ümid edirik. Son hesablamalara görə, IAP-ın 252 km uzunluqdakı Xorvatiya hissəsinə investisiyaların ümumi həcmi 700 milyon avro təşkil edəcək. Maliyyələşdirmə Aİ vəsaitləri və milli resurslar hesabına təmin olunacaq", - deyə "Plinacro"dan bildirilib.
Qeyd edək ki, İon-Adriatik boru kəməri (IAP) Cənub-Şərqi Avropanın bir çox ölkəsinə qaz nəqli üçün Trans-Adriatik boru kəmərinə (TAP) qoşula bilər.
Boru kəmərinin ötürücülük qabiliyyəti ildə beş milyard kubmetr qaz təşkil edəcək.
(Tərcümə: Rəna Əbdürəhmanova)
Twitter: @Lyaman_Zeyn