Noyabrda "Azəri-Çıraq-Günəşli" (AÇG) dəniz blokunu mənimsəyən Azərbaycan Beynəlxalq Əməliyyat Şirkətinin (ABƏŞ) tərəfdaşları Gürcüstanın Supsa limanından yüklənəcək Azəri Light neftinin həcmini 645 min tondan 535 min tonadək azaltmağı planlaşdırır. İnformasiya mənbələrindən Trend ə məlum olub ki, 535 min ton neft altı tanker partiyası ilə yüklənəcək.
Mənbənin sözlrinə görə, noyabrda 80 min ton olmaqla beş tanker partiyası neft yüklənəcək. Bir partiya - 135 min ton ARDNŞ-nin payına düşür. Bu partiya ARDNŞ-nin AÇG layihəsindəki 10% iştirak payına görə gəliridir.
2005-ci ilin yanvar-sentyabr ayları ərzində ABƏŞ ümumilikdə 7,511 mln. ton neft ixrac edib ki, bu da 2004-cü ilin doqquz ayı ilə müqayisədə 2,97 mln. ton çoxdur.Bakı-Supsa boru kəməri ilə 5,157 mln. ton Azəri Light nefti ixrac edilib. Sentyabrda ABƏŞ 1,173 mln. ton neft ixrac edib ki, bu da 2004-cü ilin avqust ayı ilə müqayisədə 224,7 min ton, sentyabr ayı ilə müqayisədə isə 617 min ton çoxdur. Bakı-Supsa boru kəməri ilə 589,4 min ton neft nəql olunub.