"Azəriqaz" QSC Səngəçal-Qaradağ-Hacıqabul yeni qaz kəmərinin tikinti layihəsinin həyata keçirilməsi üçün vəsait axtarışı ilə məşğuldur. Bu barədə Trend ə QSC-dən xəbər veriblər. Yaxın günlərdə qaz kəmərinin tikinti layihəsinin texniki-iqitsadi əsaslandırmasının hazırlığı başa çatacaq. Bu, "Şahdəniz" qaz-kondensant yatağından qapalı səhmdar cəmiyyətin qaz-nəqliyyat sisteminə qazın qəbulu üçün labüddür.
Səngəçal-Qaradağ-Hacıqabul yeni qaz kəmərinin uzunluğu 68 km olacaq. İlkin qiymətləndirmələrə görə bu layihənin həyata keçirilməsi üçün 45 milyon ABŞ dolları lazımdır.
Hazırda "Azəriqaz" sistemi "Şahdəniz" yatağından ilk mərhələdə nəzərdə tutulmuş həcmdə - sutkada 10 milyon kub metr qazı qəbul etməyə qadirdir. 2007-ci ildə QSC sistemi yataqlardan Azərbaycana veriləcək bütün qazı, həmçinin "Azəri" yatağından veriləcək səmt qazını qəbul edə biləcək.
