Bu il Xəzərin Azərbaycan sektorundakı "Şahdəniz" qaz-kondensat yatağından təxminən 1 mlrd 200 mln kub metr qaz hasil ediləcək. Bu barədə Trend ə Azərbaycanın sənaye və energetika naziri Natiq Əliyev məlumat verib. "Biz hesab edirik ki, bu il Türkiyə bu yataqdan qaz qəbul edə bilməyəcək. Azərbaycan bu qazın bütün həcmini almağa hazırdır", - deyə o qeyd edib.
"Şahdəniz" layihəsi üzrə tərəfdaşlarla danışıqlar zamanı qaz hasilatının həcminə yenidən baxılıb. Əvvəllər güman edilirdi ki, bu il (yataqdan qaz hasilatına 2006-cı il sentyabrın sonunda başlanması nəzərdə tutulub) yataqdan 850 mln kub metr qaz hasil ediləcək. Ancaq bu göstərici artıb.
N.Əliyev bildirib ki, yataqda 4-cü quyu qazılıb və onun nəticələrinin qiymətləndirilməsi üzrə məlum olub ki, bu ilin sonunadək "Şahdəniz"dən 1 mlrd 140 mln- 1 mlrd 200 mln kub metr qaz hasil ediləcək.
Müqaviləyə görə, bu yataqdan hasil edilən qaz Azərbaycan, Türkiyə və Gürcüstana, o cümlədən kiçik hissə BTC Co şirkətinə satılacaq.