"Azərenerji" səhmdar cəmiyyəti Əlibayramlı İES-in yenidənqurulması nəticəsində orada quraşdırılacaq qurğuların prioritet gücünü müəyyənləşdirib. Qurğuların ümumi gücü 1000 mVt təşkil edəcək. Bu barədə Trend ə səhmdar cəmiyyətin baş mühəndisi Saleh Məmmədov xəbər verib.
Onun sözlərinə görə, hazırda bu elektrik stansiyasında quraşdırılacaq qurğuların tipi haqqında məsələ gözdən keçirilir. Səhmdar cəmiyyətin mütəxəssisləri müxtəlif avadanlıq tipləri ilə tanış olur, bundan sonra avadanlıq stansiyasında quraşdırılacaq tip haqqında qərar qəbul olunacaq.
Səhmdar cəmiyyətin mütəxəssisləri müxtəlif ölkələrdə avadanlıqla tanış olmaq niyyətindədir. O cümlədən, Çində qurğuların gözdən keçirilməsi də planlaşdırılıb. "Azərenerji" mütəxəssislərinin Çinə səfəri Xaçmaz yarımstansiyası üzrə tenderin tamamlanmasına qədər təxirə salınıb. Çin şirkətləri bu tenderdə iştirak edir və ona görə də SC nümayəndələrinin bu ölkəyə səfəri arzuolunmazdır.
Azərbaycan mütəxəssisləri Çinə səfər zamanı Pekində, Xarbində, Urumçi və digər şəhərlərdə elektrik stansiyalarının işi ilə tanış olacaq.
Hazırda səhmdar cəmiyyət Əlibayramlı İES-də həm mazut, həm də qazla işləyəcək avadanlığın quraşdırılması ehtimalını gözdən keçirir.
