Azərbaycan, Bakı /müxbir Trend S.Əliyev/Azərbaycan Beynəlxalq Əməliyyat Şirkəti (ABƏŞ) Azərbaycan Dövlət Neft Şirkətindən (ADNŞ) "Azəri-Çıraq-Günəşli" yatağında neftin hasil olunduğu "Fasilə layı"ndan yuxarıda yerləşən 8-ci qaz horizontundan (Balaxanı layı) qazın hasilatına başlamaq üçün icazə gözləyir. Bu barədə çərşənbə axşamı ADNŞ-in geologiya, geofizika və mədən üzrə birinci vitse-prezidenti Xoşbəxt Yusifzadə məlumat verib.
Bu qazın hasilatı ABƏŞ-ə onu geriyə plasta vurmağa imkan verəcək, bu da yataqda neft hasilatının artırılıması və sabitləşdirilməsinə imkan verəcək. "Fasilə layı"ndan yuxarı horizontlarda işlər üçün yeni müqavilənin imzalanması tələb olunmur, lakin ADNŞ-in rəsmi icazəsinin alınması lazımdır.
Yusifzadənin sözlərinə görə, hazırda ABƏŞ ADNŞ-ə pulsuz olaraq "Azəri-Çıraq-Günəşli" yatağından sutkada 7-8 mln. kubmetr səmt qazı təqdim edir.
"ABƏŞ-in bizə davamlı olaraq sutkada 8 mln. kubmetrədək səmt qazı təqdim etməsi üçün onlar Balaxanı layında qaz hasilatına başlamağı təklif edir", deyə o bildirib.
Hazırda Azərbaycan Dövlət Neft Şirkəti Balaxanı layını, xüsusilə "Günəşli" yatağının azsulu hissəsində işləyir, burada hasilat şəxsi güc hesabına həyata keçirilir. Yalnız bu il ADNŞ qaz hasilatının artırılması üçün 13-20 quyu qazmaq niyyətindədir.
"Azəri-Çıraq-Günəşli" yatağında hasilatın işçi bölünməsi haqqında saziş 1994-cü ilin sentyabrında imzalanıb və 30 il ərzində müqavilə sahəsinin işlənməsini nəzərdə tutur.
Sazişin iştirakçıları: BP (operator - 34,1 faiz), Chevron (10,2 faiz), ADNŞ (10 faiz), INPEX (10 faiz), Statoil (8,6 faiz), ExxonMobil (8 faiz), TPAO (6,8 faiz), Devon (5,6 faiz), ITOCHU (3,9 faiz) və Hess (2,7 faiz).