Azərbaycan, Bakı / Trend / "Azərenerji" səhmdar cəmiyyəti ilə "İnter RAO EGS" arasında yaxın zamanlarda Rusiyadan elektrik enerjisinin Azərbaycan ərazisi ilə Gürcüstana verilməsinə dair danışıqlar keçiriləcək. Bu barədə "AzərTAc" dövlət agentliyinin Rusiya şirkətinin nümayəndəsi Boris Zverevə istinadən yaydığı məlumatda deyilir.
Zverevin sözlərinə görə, bu layihə kommersiya nöqteyi-nəzərdən çox cəlbedicidir və iqtisadi model qismində çox effektli ola bilər. Hazırda məsələ müxtəlif səviyyəli ekspertlər tərəfindən müzakirə olunur.
Rusiya şirkəti Gürcüstanın yüksək gərginlik və paylayıcı şəbəkələrini idarə edir. Elektrik enerjisinin satışı üçün bu şirkət elektrik enerjisini Azərbaycan vasitəsi ilə ötürmək niyyətindədir.
Hazırda Rusiya Azərbaycana bilavasitə ölkə daxilində istifadə üçün nəzərdə tutulan elektrik enerjisi verir. Ölkələr arasında elektrik enerjisinin mübadiləsi aparılır.