Azərbaycan, Bakı, 02 iyul / Trend , müxbir Q.Vəliyev /
Mədəniyyət və Turizm Nazirliyinin Bakı Turizm və İnformasiya Mərkəzi (BTIM) regional səviyyədə Online-bronlama şəbəkəsini genişləndirir. Bu barədə cümə axşamı mərkəzin Turizm şöbəsinin başçısı Zaur Əliyev bildirib.
Onun sözlərinə əsasən, hazırda Şəki-Qəbələ zonasında şəbəkənin genişləndirilməsi işləri həyata keçirilir, gələcəkdə isə şəbəkə Lənkəran və Quba ərazilərini də əhatə edəcək.
Hazırda sistem Bakıda uğurla işlədilir. Regional səviyyədə istirahət evləri və mehmanxanalarda nömrələrin olması barədə məlumat mübadiləsi elektron poçt vasitəsilə həyata keçirilir.
Şəbəkə VPN (Virtual Private Network) platformasında qurulub. Platforma ayrı-ayrı ofislərin yerli şəbəkələrini birləşdirməyə, ümumi istifadə şəbəkəsinə, vahid virtual şəbəkəyə qoşulmaya imkan yaradır, onun vasitəsilə ötürülən məlumatın məxfiliyini və bütövlüyünü təmin edir. VPN texnologiyasının istifadəsi korporativ şəbəkələrin viruslardan və təhlükələrdən qorunması üçün vacibdir.
Bir çox turizm agentliklərinin fəaliyyəti regional səviyyədə aparılır, bu isə informasiyanın toplanması üçün müxtəlif problemlər yaradır. BTİM korporativ şəbəkəsi ilk növbədə bu problemlərin aradan qaldırılmasına yönəlib.
Məqalə müəllifi ilə əlaqə ünvanı: [email protected]
